Электрондық музыка индустриясы соңғы он жылда таңғаларлық өсімді көрсетіп, шекаралар мен жанрлардан асып түсетін жаһандық мәдени қозғалысқа айналды. Андеграунд ұжымдарынан бастап ауқымды фестивальдерге дейін электрондық музыка үнемі дамып, әртүрлі қауымдастықтарды біріктіріп, әлемдік музыка сахнасын қайта қалыптастыруда. Бұл өсім Берлин немесе Лондон сияқты ірі орталықтарда ғана емес, Орталық Азия секілді аймақтарда да байқалады. Мұнда күн сайын жаңа дауыстар мен ұжымдар пайда болып жатыр.
Бүгін менің қасымда сол жаңа дауыстардың бірі — Tangbosh, сондай-ақ Таңбол деген атпен танымал. Қытайдың Шыңжаң аймағындағы Үрімші қаласында туылып, ол қазір Австрияның Вена қаласы мен Қазақстанның Астана қаласының арасында тұрады. Tangbosh — қазақстандық Mobile Suburb электрондық музыка лейблінің негізін қалаушы және Қазақстандағы андеграунд электрондық музыка ұжымы — ZVUK-тың резидент-диджейі. Оның шығармашылығында түрлі мәдениеттердің ықпалы байқалады, бұл оған әртүрлі жанрларды зерттеп, үйлестіруге мүмкіндік береді.

Айман Курманова: Таңбол, уақыт бөлгеніңе рахмет! Әңгімемізді жаңа тректерді қалай жазатыныңнан бастасақ. Сені не шабыттандырады және оған нәр беретін не?

Tаңбол: Мен шабытты сан түрлі нәрселерден аламын, бірақ шығармашылық процесім әдетте сэмпл таңдаудан басталады. Өзіме тән ерекше дыбыстарды табу үшін медиа қорымды ақтарып, солардың негізінде трек құруға кірісемін. Менің дыбыстық стиліме 90-жылдардың соңы мен 2000-жылдардың басындағы музыка қатты әсер етті. Modern Talking, Smile.dk, Vengaboys және The Prodigy сынды әртістер электрондық музыканы алғаш таныстыруда маңызды рөл атқарды. Үрімшіде өскенде, евродэнс жанры барлық жерде естілетін: тойларда, көшелерде, радиоларда. Сол кезеңдегі әсерім әлі күнге дейін шығармашылығымда көрініс табады — тректерімде 90-жылдар элементтері жиі кездесетіні содан.

А.К.: Қазақстанда электрондық музыканың дамуын қалай көресің?
T.: Қызықты сұрақ. Меніңше, жанрдың дамуы ғана емес, ең алдымен, мықты әрі инклюзивті қауымдастықтың құрылуы маңызды. Өркендеген музыкалық орта тек музыканың өзімен шектелмейді, бұл — әртістердің еркін өзін-өзі көрсетуіне мүмкіндік беретін және қолдау көрсететін кеңістік. Әртүрлі электрондық музыка стильдерін қабылдап, әйел диджейлерді белсенді қолдау да аса маңызды. Түрлі дауыс пен көзқарастар естіліп, бағалануы жөн.

А.К.: Сен — Mobile Suburb лейблінің негізін қалаушысысың. Бұл жобаның артындағы идея қандай және сіздер қандай әртістерді қолдауға ұмтыласыздар?

T.: Mobile Suburb-ты біз 2020 жылы Ельнұр Төлеуханмен (E.T.) бірге аштық. Алғашқы ЕР альбомымызды шығарғаннан кейін әлемнің түкпір-түкпірінен — Азиядан Еуропаға дейінгі диджейлер мен әртістерді шақырып, подкасттар сериясын бастадық. Алматыда есте қаларлық түндерді өткіздік, енді сол тәжірибені Астанаға да алып келуді жоспарладық.
Біз ең таза күйіндегі музыкасын ұсынуға дайын әртістерді қолдауға құштармыз. Музыканың тек би алаңына арналатын, сонымен бірге ой тудырып, сезім оятатын әуен біз үшін маңызды.

А.К.: Сенің музыкалық шығармашылығыңда мәдени ықпалдар көп. Өзіңнің тамырларың саған қалай әсер етеді?
T.: Мен көпұлтты әрі мәдениеті бай Үрімшіде өстім. Осындай түрлі этникалық ортада өскенім сан алуан музыкалық әсер алуыма себеп болды. Бұл менің шығармашылығымда да көрініс табады — түрлі дыбыстар мен стильдер тоғысып, өзіндік бірегейлік қалыптасады.

А.К.: Сенің арман коллаборацияң бар ма? Мүмкін, әртіс, фестиваль немесе белгілі бір алаң шығар?
T.: Арман коллаборация десе, мен Александр Маккуиннің (егер ол әлі тірі болғанда) сән көрсетіліміне саундтрек жазғым келер еді. Оның шығармашылығы мен эстетикасы маған үнемі шабыт сыйлап келеді. Әсіресе, Dante (күз-қыс 1996) топтамасы менің жадымда ерекше әсер қалдырды — визуалды және есту тұрғысынан тамаша туынды болды. Соңғы жылдары Balenciaga сияқты брендтер визуалды шекараларды кеңейтуге тырысқанымен, Маккуиннің көркемдік көзқарасы әлі де теңдессіз деп санаймын.

А.К.: Инженерлік жұмысыңды (дұрыс атауы қалай?) шығармашылықпен және лейблді басқарумен қалай үйлестіресің?
T.: Әлбетте, бұл оңай емес — шаршататын сәттер болады. Дегенмен, музыка — менің күйзелістен арылу жолым. Қандай қиын күн өтсе де, музыка мені әрдайым қуантады әрі тосынсыйлар сыйлайды. Кейде ең ауыр күннің соңы керемет шоумен аяқталуы мүмкін!

Mobile Suburb жайлы толығырақ білгіңіз келсе: Mobile Suburb

ZVUK ұжымы туралы мәлімет: ZVUK